درره ميؤن پيلا بيام. صؤبˇ سر که خابˇ جا پا بام و آسمؤنأ نگا کؤردؤم، کوها ديؤم و آفتاوأ که کوهˇ پؤشتˇ جا بيرون اوميه و گاگِلِفيم، ابر و تِرمی.

يه‌ته صؤب، پنج ساله بام، مِه چيؤمؤنأ که بازأ کؤردم، کو پُر بأ از سفيد و سيا لککه‌هون که تکؤن خوردنه؛ گوسندؤن چرا کوردِن!

مِه نگا که زمينأ خورده، روخؤنˇ خشم و خوروشه ديؤمه. مدرسه شيأنˇ زمات روخؤنˇ امرأ هم‌سفر بام.

مِه پيلا نانجه اون روزؤن اين بأ که بتؤنم پُلˇ جا بپرم سفيدرودˇ آبˇ ميؤن. هميشه حسرتˇ جا پسرکؤنأ نگا کوردم که آبˇ ميؤن شيرجه زأينه.

زمين امما مِه امرأ سازگاری نداشت. مِه ننه هميشه گوته زمين يه‌ته گاوˇ شاخˇ سر ايشتای. وختی گاو خای زمينأ يه شاخه جا تاوده اون‌يتا شاخˇ سر، زمين لرزه.

و گاو امِنأ درره جا تاودا چای باغؤنˇ ميؤن. امه خانه عوضأ بأ و هنی سفيدرودˇ صدا مِه گوشˇ ميؤن دِبأ. هنی عوض نئبيأ بؤم…

چایˇ بوته‌هؤن کوتا بَن و مِه روبَرو افق، دشت بأ و جنگل. مونم هنی زيتون دارؤنˇ بِن خؤتأ بوم و هنی «تورˇ باد» مِه لَختˇ موهؤنأ تکؤن دأيه و اصلن نديؤم مِه تاب‌دار و نم‌بزيه موهؤنأ.

بد دردی‌يأ دربه‌دری. غريب و غريبه بأيم چایˇ سرزمينˇ ميؤن.

تابستؤنˇ کش‌دار روزˇ غروب بأ. امه ره مهمون بوميأ بأ، اون غريبˇ شهرˇ ميؤن. وقتی بشان، اوشِنˇ خالی جا فرياد کورده. در و ديوارˇ جا غم وارسته.

مه مار بوگوت «تاسيؤن بأ». اولين بار بأ تاسيؤنأ اِشنأوستؤم. بئيتره بگؤم اولين بار بأ که تاسيؤنأ حس کوردؤم. مِه مارˇ جا آنِپؤرسيؤم تاسيؤن چه معنی ده. تاسيؤن يعنی مِه اون تلخˇ خؤردئگی روز؛ هون غمگينˇ غروب.

عوضأ بأم… ديه خاکˇ جا وابسته نيؤم. هميشه مِه کابوسه که دواره تاسيؤنأ حس بکونم. ديه هيچ روخؤن و کو و دارˇ جا خاطره ندارم. ديه زيتون دارˇ بن نخوتؤم و نه کوهأ بديؤم و نه سفيدرودˇ امرأ هم‌سفر ببأم… مِه سرزمين و خلق و خوی‌ام عوضأ بأ.

□

روشنفکری بی‌درمانˇ درده. اون عامی فرد که کتاب نخؤنده، دؤنه چي‌یأ خوش داره، چی‌يأ نه! خيلی‌يؤن که ويشتر بخؤندن فکر کُنِن با تصميم بگيرن چی‌يأ خوش بدارن.

ندؤنم! شايد اوشؤن نه سفيدرودأ بيأن و نه چایˇ باغؤنأ. شايد اوشؤن هيچ وخت زيتون داره بِن نخوتن. شايد هيچ وخت تورˇ بادأ حس نکوردن و هيچ وخت تاسيؤنأ نِفأمِستن.

اگه يه‌ته دليل بخام بؤرؤم که چره مِه مأرˇ زبؤنأ خوش دارم، شايد اين ببو که مِه خؤردئگی روزؤنأ تعريف بکورده. مِه تلخˇ روزؤنأ، روزؤنی که کاش هيچ‌کی اوشؤنأ تجربه مکنه. هرچند هيچ وخت و هيچ جا، خوش داشتن دليل نخای…

□ □ □

---------------------------------------------------------------