ویکیمدیا بؤنیاد، ایته غیرانتفاعی بؤنیاد ایسسه. ای بؤنیاد، اینترنتˇ مئن چن‌ته فعاليت عهده دأنه. جه ای بؤنیادˇ تأسیسˇ زمت تا هسا هف سال گوذرنه و هسا بؤنیاده اداری ساختمؤن، آمریکا مئن دره. اگر www.wikimedia.org اینترنتی آدرسˇ مئن بشید، تینید جزییات ویشتری‌یه جه بؤنیاد بیاجید. ای بؤنیاد، اینترنتˇ مئن ایمکاناتی فراهم بئوده کی اینترنتی کاربرؤنˇ ایلجارˇ امره کار کأ دره. مو ای جیر، اوشؤنه شمه ره موعرفی کؤنم:

ویکیپدیا دانشنؤمه “www.glk.wikipedia.com” کی ایته اینترنتی دانشنؤمه ایسسه. ای دانشنؤمه اوتؤ نیه کی چن نفر همدیگرˇ امره جومأ بن و اونه بنویسن؛ بلکی هرکی که ایبچه اینترنتˇ امره آشنایی بداری تینه ای دانشنؤمه مئن همکاری بکونی و اونه گوسترش هدأی. هینˇ واسی ایسسه کی هسا ای دانشنؤمه خیلی جلبˇ توججؤ بئوده و پور کسؤن اگر بخأن ای چی جی مطلب بوخؤنن، شنن ویکیپدیا دانشنؤمه مئن و اؤره واموج‌دموج کؤنن. وا گوتن کی تا هسا چن‌ته معتبر مجلله و روزنامه نی، ای دانشنؤمأ به عنوان خو منبع به کار ببوردن.

هوتؤری کی بئوته ببؤ، ای دانشنؤمه مئن هرکی تینه مقاله بنویسی یا دیگرؤنˇ مقاله‌ٰنه دچين‌واچين (ویرایش) بکونی و ای کارئبه، حتی نیاز به عضو بؤن نیه و هیتؤ نی شأنه وبسایتˇ مئن همکاری گودن.

هوتؤ کی تا هسا بده ببؤ، کسؤنی کی ای اینترنتی دانشنؤمه مئن کار کأ درن، سعی بئودن کی هرچی ویشتر اونه پوربارتر بکونن و اطلاعاتˇ دوروس‌تری‌یه وارد بکونن. و اگر دیگر کاربری بخأی نادوروس مطلب وارد بکونی، دیگر کاربرؤن فهمنن و اونˇ جولؤ گینن. ای دانشنؤمه مئن شمه نوا حتمن سواد خاصصی بدأرید تا بوتؤنید فعالیت بوکونید و هوتؤ کی بئوته ببؤ هرکی تینه اؤره مدخل ایضافه بکونی و دگیرؤنˇ مقالهٰ‌نه دچين‌واچين (ویرایش) بکونی.

اگر فیکر کؤنید کی چوتؤ تینید ای اینترنتی دانشنؤمه مئن فعالیت بکونید، وا بگؤم کی هرته جه امه، ایبچه دانایی جه امه دؤر و بر دأنیم؛ به کاری کی مشغول ایسسیم یا به بازی خاصی کی علاقه دأنیم یا موعرفی کیتابی کی اونه خؤنده دریم و یا هر چیز دیگرˇ جی تینیم ای دانشنؤمه مئن بنویسیم. به هر حال دانشنؤمه منبعی ایسسه کی وا در مورد هرچی اونˇ دیرین مطلب بنأ بی. کسؤنی ای دیده دأنن کی ویکیپدیا دانشنؤمه تینه ایته تحقیقاتی جا امه بیاته‌ئنˇ واسی جه علمی فعالیتؤن ببی. یعنی شأ جه چیزؤنی کی دؤنیم و هسا اثبات نبؤ نی بنویسیم.

اما ویژگی دیگرˇ ای اینترنتی دانشنؤمه، ای ایسسه کی به چن زوانˇ موختلف اونˇ دیرین شأنه مقاله نویشتن کی یه‌ته جه او زوانؤن «گیلکی» ایسسه. گیلکی زوان در تاریخˇ کورچˇ ما، سالˇ 1580 گالشی تقویم (سپتامبر 2006) ویکیمدیا بؤنيادˇ مئن پذیرفته ببؤ و امه گیلکی ویکیپدیا جه نظرˇ تعداد مقالات جزو 150 زوانˇ برتر ایسسه و ای جیگا، گیلکی زوانؤنˇ فعالیتˇ امره حاصل ببؤ. اگر شمه نی خأنید که به گوسترش ویکیپدیا دانشنؤمه به زوانˇ گیلکی کومک بکونید تینید به اینترنتی آدرس http://glk.wikipedia.com بشید و گیلکی زوانˇ همره و هوتؤری کی گب زئنید بنویسید. تا هسا کی ای وانیویس بنویشته بؤ دره، امه گیلکی ویکیپدیا دانشنؤمه مئن، 482 ته مدخل دأنيم کی هر روز نی کامل‌تر بؤ دره و با توججه به ای‌که امه، سرأ گیتنˇ زمتˇ مئن ایسأیم، ای تعداد مقاله خؤرؤم ایسسه.

ویکیمدیا بؤنیاد با توجه به مردومˇ درخواست، دیگر ایمکانؤنی نی هر زوانی‌یه هدئنه کی گیلکی زوانؤن دیگر زوانؤنˇ مورسؤن سعی کأ درن با درخاستؤنی کی هدئنن، بؤنیاده راضی بکونن تا او ایمکانؤنه نی، به زوان گیلکی هدأن؛ شمه نی بشید و اوشؤنه کومک بکونید. دیگر ایمکانؤنی کی هله را دنکتن ايشؤنن:

«ویکی خبر»، خبر سرأدأنˇ واسی. «ویکی دیکشنری» کی اونˇ مئن هرکی تینه گیلکی لوغتؤنه ایضافه بکونی. «ویکی بگوته»، به زوان گیلکی شعر و سخن و پند و اندرز نأنˇ واسی. «ویکی کیتاب» کی اگر را دکأی، همدیگرˇ ایلجارˇ امره به زوان گیلکی شأنه کیتاب بنویسیم. «ویکی دانشگا» کی اونˇ مئن هرکی تینه دیگرؤنه چیز یاد بدی و دیگرؤنˇ جی ای چی باموجی.

به غیرˇ ایشؤن، چن‌چی ديگرأ نی هننأ کی شمره دعوت کؤنم خودتؤن بشید و اوشؤنه بیاجید.

---------------------------------------------------------------